ಸವಿರುಚಿ

ಜನಪ್ರಿಯ ಕಾರ್ಯಕ್ರಮ ಸವಿರುಚಿಯ ಮೂರನೇ ಸೀಸನ್ ಒಂದು ಅಸಾಧಾರಣ ಪಾಕಪಯಣ. ಕರ್ನಾಟಕದ ವೈವಿಧ್ಯಮಯ ಹಾಗೂ ಶ್ರೀಮಂತ ತಿನಿಸು ನಕಾಶೆಯನ್ನು ಬೆನ್ನತ್ತಿ ನಿಮಗೆಲ್ಲ ರಾಜ್ಯದ ಮೂಲೆ ಮೂಲೆಯ ವಿಶಿಷ್ಟ ಅಡುಗೆಗಳ ರುಚಿ ತೋರಿಸುವ ಪ್ರಯತ್ನವಿದು. ಈ ಪಾಕಪಯಣದಲ್ಲಿ ನಮ್ಮನ್ನು ಸುತ್ತಾಡಿಸುವ ಹೊಣೆ ಹೊತ್ತಿರುವುದು ಪ್ರತಿಭಾನ್ವಿತ ನಿರೂಪಕಿ ಜಾಹ್ನವಿ. ಇಂಟರ್ ನೆಟ್ಟನ್ನು ಅಲ್ಲಾಡಿಸಿರುವ ಬೆಳ್ಳುಳ್ಳಿ ಕಬಾಬ್ ಖ್ಯಾತಿಯ ಚಂದ್ರು ಈ ಶೋನಲ್ಲಿ ಖಾಯಂ ಸೆಲೆಬ್ರೆಟಿ ಬಾಣಸಿಗನಾಗಿ ಜಾಹ್ನವಿಗೆ ಜೊತೆ ನೀಡಲಿದ್ದಾರೆ. ಅವರಿಬ್ಬರ ಜೊತೆಗೆ ಪ್ರತಿ ಸಂಚಿಕೆಯಲ್ಲೂ ಅತಿಥಿ ಬಾಣಸಿಗರೊಬ್ಬರು ನಿಮ್ಮನ್ನು ರಂಜಿಸಲಿದ್ದಾರೆ. ಇದಿಷ್ಟೇ ಅಲ್ಲ, ಆರೋಗ್ಯಕರ ಆಹಾರಾಭ್ಯಾಸವನ್ನು ಪ್ರೋತ್ಸಾಹಿಸಲೆಂದೇ ಒಂದು ವಿಶೇಷ ವಿಭಾಗವೂ ಈ ಶೋನಲ್ಲಿರುತ್ತದೆ. ‘ಆರೋಗ್ಯ ಅಡುಗೆ’ಯೆಂಬ ಈ ಭಾಗದಲ್ಲಿ ನುರಿತ ಆಹಾರ ತಜ್ಞರು ಪೋಷಕಾಂಶಭರಿತ ಅಡುಗೆ ತಯಾರಿಕೆ ಕುರಿತಂತೆ ತಮ್ಮ ಒಳನೋಟಗಳನ್ನು ಹಂಚಿಕೊಳ್ಳುತ್ತಾರೆ. ಮನೆ ಅಡುಗೆ ಮಾತ್ರವಲ್ಲ, ಈ ಸೀಸನ್ನಿನ ಸವಿರುಚಿಯಲ್ಲಿ ಹೊರಗಿನ ಖಾದ್ಯಗಳಿಗೂ ಅಷ್ಟೇ ಜಾಗ ಮೀಸಲಿದೆ. ಅಜ್ಜಿ ಮಾಡುವ ಉಂಡೆಗಳಿಂದ ಹಳ್ಳಿ ತಿಂಡಿಯವರೆಗೆ ಹಾಗೂ ರುಚಿಕಟ್ಟಾದ ದೇವಸ್ಥಾನದ ಪ್ರಸಾದಗಳಿಂದ ಆಹಾರಬೀದಿಗಳ ಅನನ್ಯ ತಿನಿಸುಗಳವರೆಗೆ ಈ ಅಡುಗೆ ಕಾರ್ಯಕ್ರಮದ ವ್ಯಾಪ್ತಿ ಬಲು ದೊಡ್ಡದಿದೆ. ಹಾಗಾಗಿಯೇ, ಈ ಪಾಕಪಯಣ ನೋಡುಗರ ಬಾಯಲ್ಲಿ ನೀರೂರಿಸುವುದಷ್ಟೇ ಅಲ್ಲ, ಅವರ ಮನಸಲ್ಲಿ ಬೇರೂರುತ್ತದೆ ಎನ್ನುವುದರಲ್ಲಿ ಯಾವ ಸಂಶಯವೂ ಇಲ್ಲ.